Humare Naujawan Aur Social Media

Is Zamane Mein Ab Bahut Kam Log Aise Bache Hain Jo Social Media Se Door Hain
TV, Mobile Phone Aur Internet Ke Zariye Har Shakhs Poori Dunya Se Aisa Juda Hua Hai Jaise Do Ungliya
Dunya Ke Ek Kone Mein Kuchh Hota Hai To Hazaaro Meel Door Dusre Kone Mein Fauran Khabar Pahunch Jaati Hai
Social Networking Websites Ke Zariye Mukhtalif Shehro Ke Rehne Waale Ek Dusre Ko Dost Bana Rahe Hain, In Websites Mein Facebook, WhatsApp, Twitter, Instagram, Telegram Aur Video Calling Apps Bahut Mash'hoor Hain
Naujawano Ki Aksariyat Social Media Par Maujood Hai, Shehar Kya Aur Dehat Kya Har Jagah Social Media Ka Jaal Bichha Hua Hai

Fayeda Bhi Nuqsan Bhi :-
Jahan Ek Taraf Logon Ko Social Media Se Bahut Bada Fayeda Hua Hai Wahin Dusri Taraf Bahut Bada Nuqsan Bhi Hua Hai
Fayede Aur Nuqsan Ka Daromadar Is Ke Istemal Par Hai, Agar Aap Is Ka Sahih Istemal Karte Hain To Ye Mufeed Hai Warna Mudar

Naujawano Ke Halaat :-
Kayi Naujawano Ki Time Line, Status Aur Tasveer Aisi Hoti Hain Ke Agar Un Ke Walidain Ya Ghar Waale Dekh Lein To Sharm Se Paani Paani Ho Jaayein! 
Time Line Par Behuda Lateefe, Gandi Gandi Tasveerein Aur Ghair Akhlaqi Tehreerein Maujood Hoti Hain
Agar Kabhi Kabhar Deeni Jazba Paida Ho Bhi Gaya To Ye Tehreerein Share Karte Hain Ke "Ye Message 11 Logon Ko Bhejo To Khushkhabri Milegi", "Is Mahine Ki Mubarakbad Do To Jannat Mein Jaane Se Koi Nahin Rok Sakta", "Aaj Syeda Fatima Ka Yawm -e- Wiladat Hai" (Jo Ke Social Media Par Roz Hota Hai) Waghaira 

Agar Deen Ke Liye Jazbaat Zyada Badh Gaye To Phir Ye Message Share Karte Hain "Ek Film Release Ho Rahi Hai Allah Ke Bande........" Baaqi To Aap Jaante Hi Hain

Sahih Istemal :-
Agar Aap Facebook, WhatsApp, Twitter Aur Instagram Waghaira Ka Istemal Karte Hain To Unhi Logon Ko Follow Karein Ya Friend Banayein Jin Ki Tehreerein (Posts), Tweets, Photos Aur Videos Waghaira Se Aap Ke Ilm Mein Izafa Ho Ya Koi Achhi Cheez Seekhne Ko Mile, Misaal Ke Taur Par Ulama -e- Ahle Sunnat Ko Follow Karein, Islamic Pages Ko Like Karein, Apne Dosto Aur Rishtedaro Jo In Websites Par Maujood Ho, Unhein List Mein Shamil Karein 
Jahan Kahin Koi Ghair Munasib Cheez Dekhein To Fauran Us Ke Bhejne Waale Ko Block Karein

Ghalat Istemal :-
Social Media Ka Ghalat Istemal Aap Ke Gunaho Mein Izafa Kar Sakta Hai Aur Ye Bhi Ho Sakta Hai Ke Aap Ko Jail Ki Hawa Khani Pade Lihaza Siyasi Mamlaat Mein Bahas Karne, Kisi Ko Galiyo Bhara Message Karne Aur Ghair Akhlaqi Tehreero Ya Tasveero Par Tabsera Karne Se Ijtenab Karein 

Abde Mustafa

Post a Comment

Leave Your Precious Comment Here

Previous Post Next Post