Ye Shaan -e- Ali Hai Zara Sambhal Kar

Hazrate Sayyiduna Ali Radiallaho Ta'ala Anho Farmate Hain Ke Mere Baare Mein Do Tarah Ke Aadmi Halaak Ho Jayenge, Ek Hadd Se Zyada Muhabbat Karne Waala Jo Meri Aisi Shaan Bayaan Karega Jis Ka Main Haqdaar Nahin Aur Dusra Mujh Se Bughz Rakhne Waala Jise Meri Dushmani Mujh Par Bohtan Lagane Par Aamada Karegi

(مسند احمد، مشکوٰۃ، مرقات و مرآۃ المناجیح) 

Rafzi Aur Un Ke Chhote Bhai Tafzeeli To Is Marz Mein Mubtala Hain Hi Lekin Aaj Kal Khud Ko Ahle Sunnat Kehne Waale Kuchh Afraad Bhi Is Virus Ki Zad Mein Hain
Khud Ko Muhibbe Ali Wa Ahle Bait Saabit Karne Ke Chakkar Mein Ahle Sunnat Ke Mauqif Par Hi Fatwe Jaari Farma Rahe Hain 
Tafzeeliyat Se Bezari Aur Nafrat Ka Izhaar To Karte Hain Lekin Un Ki Khud Ki Baato Se Tafzeeliyat Ki Boo Aati Hai

Abhi Mawlood -e- Kaaba Ke Mas'ale Par Hi Khud Ko "Moatbar Ulama -e- Ahle Sunnat" Kehlane Waale Chand Hazraat Ne Ye Zahar Ugla Hai Ke Jo Hazrate Ali Radiallaho Ta'ala Anho Ki Wiladat Khana -e- Kabah Mein Hone Ka Inkar Kare Wo Bughze Ali Wa Bughze Ahle Bait Mein Mubtala Hai Aur Khandaan -e- Rasool Ki Tanqees Ka Pahlu Talaash Kar Raha Hai 
In Moatbar Ulama (Jo Ke Asal Mein Ek Muqarrir Se Zyada Nahin) Ko Chahiye Tha Ke Shaakh Kaatne Se Pehle Ye Dekh Lein Ke Khud Ki Tashreef Kis Shaakh Par Jami Huyi Hai Lekin Aao Dekha Na Taao Firing Shuru Kar Di Aur Anjaam Ye Hua Ke Sureen Zameen Par Giri
Inhein Chahiye Tha Ke Is Tehqeeqi Mas'ale Mein Taang Na Adayein Kyunki Kehte Hain "Jis Ka Kaam Usi Ko Saaje" Lekin Dil Hai Ke Kabhi Kabhi Zaleel Karwa Kar Hi Chhodta Hai

Agar In Ki Ye Baat Tasleem Kar Li Jaaye Ke "Jo Hazrate Ali Ko Mawlood -e- Kaaba Na Maane Wo Bughz....... Alakh" To Phir Saikdo Akabireen -e- Ahle Sunnat Ko Dushman -e- Ahle Bait Qaraar Dena Hoga Jin Mein Imam Jalaluddin Suyooti, Imam Nawawi, Imam Shamsuddin Muhammad, Imam Muhammad Bin Ali Shafayi, Imam Shahabuddin Khifaji, Allama Husain Dayaar Bakari, Imam Bahauddin Makki, Allama Halabi, Imam Ibne Asakir, Allama Jamaluddin Afriqi Waghaira Samet Deegar Kayi Ulama Shamil Hain! 

Agar Zyada Door Na Jaayein To Sadarushshariah, Hazrat Allama Mufti Amjad Ali Aazmi, Faqeeh -e- Millat, Hazrat Allama Mufti Jalaluddin Ahmad Amjadi, Hakeemul Ummat, Mufti Ahmad Yaar Khan Nayeemi Alaihimur Rahma Par Bughz -e- Ahle Bait Ka Fatwa Laga Kar Dikhayein (Jo Anjane Mein Aap Laga Bhi Chuke Hain) Taaki Aap Ko Muhibbe Ahle Bait Ka Award Diya Jaa Sake

Ahle Sunnat Wa Jama'at Etidal Pasand Hai Lihaza Apni Shiddat Pasandi Ko Is Mein Shamil Karne Aur Is Par Muhabbat -e- Ahle Bait Ka Label Laga Kar Dusro Par Keechad Uchhalne Ki Koshish Na Karein, Ye Humari Guzarish Hai Aur Isi Mein Aap Ki Salamati Bhi Hai Warna Jab Giraft Hogi To Kayi Haath Zad Mein Aayenge

Abde Mustafa

Post a Comment

Leave Your Precious Comment Here

Previous Post Next Post