Ek Ladki Chahiye 

Ek Ladka Hai, Jise Aap "Molvi Type" Keh Sakte Hain Kyunki Wo Dadhi Nahin Mundwata, Coat Pant Nahin Pehenta, Cinema Gharo Mein Film Dekhne Nahin Jaata, Gaane Nahin Sunta, Ladkiyo Ke Saath Chhed Chhad Nahin Karta, Cigarette, Tambakoo Waghaira Ko Haath Tak Nahin Lagata, Gaaliya Bhi Deni Nahin Aati Aur Is Ke Ilawa Bhi Bahut Si Baatein Hain Jo Us Mein Nahin Paayi Jaati
Ab Us Ladke Ko Apni Is Lutfo Lazzat (Entertainment) Se Khaali Zindagi Mein Ek Ladki Chahiye Jis Se Wo Nikah Kar Ke Use "Bore" Kar Sake Aur Apni Tarah Use Bhi "Black And White" Bana Sake

Ek To Aise Ladke Se Nikah Karna Hi Bahut Badi Baat Hai Upar Se Janab Ke Nakhre To Dekhiye Ke Sharait Aur Farmaisho Ki Ek Lambi Chaudi Fehrist (List) Bhi Tayyar Kar Rakhi Hai Jise Hum Yahan Naqal Kar Rahe Hain
Qarayeen (Padhne Waale) Batayein Ke Aise Ladke Se Kaun Nikah Karegi? 

Ek Ladki Chahiye Jo :

(1) Ahle Sunnat Ke Aqaid Se Poori Tarah Waaqif Ho Aur Apni Zaroorat Ke Masail Ko Bina Kisi Ki Madad Ke Az Khud Kitabo Se Nikaal Sake, Us Ke Paas Sanad (Degree) Ho Ya Na Ho, Is Se Koi Gharz Nahin Bas Ilm Hona Chahiye 
Agar Madrase Mein Padhayi Na Bhi Ki Ho Tab Bhi Koi Baat Nahin 

(2) Sihhat Mand Ho Aur Umr Bees Se Tees Ke Darmiyan Ho Aur Rahi Baat Khoob Soorat Hone Ki To Asal Khoob Soorati Insan Ke Akhlaq Hain

Ladki Ke Ghar Waalo Se Mutalbaat (Demands) 

(3) Kisi Bhi Tarah Ki Len Den Nahin Hogi, Ab Chahe Wo Naqadi Ho, Jahez Ho, Moonh Dikhayi Ho Ya Koi Aur Nazrana Waghaira Ho

(4) Jahez Mein Qeemti Samaan Maslan : Gaadi, Fridge, Cooler, AC, Pankha, TV, Palang, Sofa, Gadde, Kursi, Table, Zewraat, Bartan, Mixer Machine, Grinder Machine, Washing Machine Aur Mobile Waghaira Harghiz Qabool Nahin Kiye Jayenge Aur In Ke Ilawa Kuchh Dene Ke Bajaye Ladki Ko Kuchh Deeni Kitabein De Sakte Hain

(5) Gaana Bajana Bilkul Nahin Hona Chahiye, Na To Mehfil -e- Nikah Mein, Na Baraat Mein Aur Na Kisi Aur Hawale Se
Is Ke Saath Saath Aurato Ke Geet Waghaira Gaane Par Bhi Pabandi Honi Chahiye 

(6) Ghair Sharayi Aur Ghair Zaroori Rasmo Riwaaj Ki Sakht Manahi Hai
Haldi Ki Rasm, Gaane Aur Dhol Bajane Ki Rasm, Lagan Lagane Aur Sandal Utarne Chadhane Ki Rasm, Sindoor Lagane Ki Rasm, Gaaliya Dene Ki Rasm, Moonh Dikhayi Aur Jeb Bharayi Ki Rasm, Raat Ko Jaagne Aur Subah Mein Shadi Ki Rasm, Kapdo Ki Tokri Badalne Ki Rasm, Kisi Ko God Mein Uthane To Kisi Ko Dhaage Se Naapne Ki Rasm, Kisi Ko Meetha Khilane To Kisi Ka Joota Churane Ki Rasm, Doodh Mein Anguthi Dhoondne Ki Rasm Aur Widayi Ke Waqt Ki Chhattis Qism Ki Rasmein, Sab Par Sakhti Se Pabandi Aayid Honi Chahiye, Dusre Alfaaz Mein Yun Samajh Lein Ke Sirf Nikah Hoga

(7) Aurato Aur Ladkiyo Ki Bheed Bilkul Nahin Honi Chahiye, Agar Aap Ne Dawat Di Hai To Un Ke Liye Bilkul Alag Intezam Hona Chahiye Taaki Mard Wa Aurat Ek Mehfil Mein Be Parda Jama Na Ho
Behtar Hoga Ke Aurato Ko Dawat Na Dein Aur Rahi Baat Baraat Ki To Us Mein Do Ya Teen Se Zyada Auratein Nahin Hongi

(8) Kul (Total) Baraatiyo Ki Tadaad Bees Se Bhi Kam Hogi Jin Ke Liye Khana Tayyar Karne Ki Ijazat Nahin Hain

(9) Baraat Din Mein Aayegi Aur (Chand Ghanto Baad) Din Hi Mein Waapsi Hogi

(10) Ladke Ke Ustaz -e- Giraami Nikah Padhayenge Aur Batane Ka Maqsad Ye Hai Ke Waqte Nikah Kisi Tarah Ki Baat Na Ho
Aap Ke Ilaaqe Mein Agar Koi Anjuman, Committee Ya Tanzeem Hai Jo Ladke Waalo Se Makhsoos Raqam (Masjid, Madrasa Aur Qabristan Ke Liye) Leti Hai To Wo Pehle Hi Ada Kar Di Jayegi Lekin Nikah Mein Un Ki Kisi Bhi Qism Ki Koi Dakhal Andazi Nahin Honi Chahiye 

Ab Batayein Ke Nikah Ke Liye Kaun Tayyar Hoga? Ladke Ka Kehna Hai Ke Is Mein Izafa Bhi Karna Hai, Ye Kya Kam Tha Jo Izafe Ki Zaroorat Aan Padi? 
Dosto Ne Samjhaya Ke In Sharait Ko Dekh Kar Koi Tayyar Nahin Hoga Lekin Ladka Hai Ke Zidd Par Qaayim Hai Aur Kehta Hai Ke Har Ladke Ki Soch Aisi Hi Honi Chahiye 

Ab Aap Hi Samjhayein Ke Ye Daur DJ, Party, Masti Aur Full Entertainment Ka Hai, Aise Rangeen Zamane Mein Kaun Aap Ki Black And White Par Tawajjoh Dega

Agar Har Ladke Ki Soch Aisi Ho Gayi To.......... 

Abde Mustafa

Post a Comment

Leave Your Precious Comment Here

Previous Post Next Post