Ladkiyon Ko Padhana Sahih Nahin Hai

Unwaan (Title) Dekh Kar Bhadakne Se Pehle Humari Poori Baat Sun Lein,
Humein Maloom Hai Ke Jab Koi Deeni Ilm Rakhne Waala "Molvi Type" Shakhs Aisi Baatein Karta Hai Ke "Ladkiyo Ko Ye Nahin Karna Chahiye, Wo Nahin Karna Chahiye....." To Kayi Logon Ko Badi Takleef Hoti Hai

Abhi Ek Muqabla (Competition) Chal Raha Hai Ke "Ladkiya Kisi Se (Khaas Kar Ladko Se) Kam Nahin Hain" Aur Taqreeban Har Shakhs Apne Ghar Ki Ladkiyo Ko Is Muqable Ka Hissa Banana Chahta Hai
Ladka School Jayega To Ladki Bhi Jayegi, Ladka College Jayega To Ladki Bhi Jayegi, Ye Gaadi Chalayega To Wo Bhi Chalayegi, Ye Naukri (Job) Karega To Wo Bhi Karegi, Agar Ye Kushti (Boxing) Karega To Us Ne Bhi Chudiya Nahin Pehni Hain Aur Agar Ye Siyasat (Politics) Mein Aayega To Wo Bhi Election Ladegi! 

Is Muqable Mein Jo Cheez Kinare (Side) Kar Di Gayi Wo Hai "Shariat" Aur Ab To Ye Sab Itna Aam (Common) Ho Chuka Hai Ke Ghalat Ko Ghalat Hi Nahin Samjha Jaata! 
Aise Halaat Mein Phans Jaata Hai "Molvi Type" Shakhs Jo Logon Ko Ye Samjhane Nikalta Hai Ke Sahih Kya Hai Aur Ghalat Kya Hai 

Baatein To Bahut Hain Par Ab Hum Unwaan (Title) Ki Taraf Laut'te Hain
Humara Ek Sawal Hai Ke Ladkiyo Ko Padhane Ki Kya Zaroorat Hai? 
Hum Jaante Hain Aap Ke Paas Kayi Jawabaat Hain Aur Agar Nahin Bhi Hain To Aap Ko Kahin Se Intezam Karne Honge Lekin Pehle Sawal Ko Achhi Tarah Samajh Lijiye, 
Sawal Mein "Padhane" Se Muraad Jadeed Asri Uloom Yaani Matric, Intermediate, Bachelor, Master Waghaira Hain Na Ke Deeni Uloom Jo Ke Aaj Kal Itna Padhaya Jaata Hai Ke Ladke Waalo Se Kaha Ja Sake Ke "Ladki Quraan Padhna Jaanti Hai" 
Ab Aap Kayi Jawabaat De Sakte Hain Jin Ka Seedha Talluq (Connection) Us Muqable Se Hoga Jo Hum Ne Bayaan Kiya Aur Baat Phir Wahin Aa Gayi Ke Aap Bhi Isi Muqable Ke Chakkar Mein Kisi "Ek Cheez" Ko Kinare (Side) Karna Chahte Hain Jis Ka Naam Upar Bayaan Ho Chuka Hai 

Jis Cheez Ko Kinare Kiya Ja Raha Hai, Us Ko Zara Saamne (Front Mein) Rakhte Hain, Ek Aisa Pahlu Nazar Aata Hai Jis Ki Ek Jhalak Se Aise "Muqablo" Ka Koi Koi Wujood Hi Baaqi Nahin Rehta, Chunanche :
Imam -e- Ahle Sunnat, Aala Hazrat Rahimahullahu Ta'ala Likhte Hain Ke Sahih Hadees Se Saabit Hai Ke Ladkiyo Ko Surah -e- Yusuf Shareef Ki Tafseer Na Padhayi Jaaye

(ملخصاً: فتاوی رضویہ، ج24، ص456) 

Surah -e- Yusuf Quraan Ka Hissa Hai, Jis Ke Baare Mein Allah Ta'ala Irshad Farmata Hai :

نَحْنُ نَقُصُّ عَلَیْكَ اَحْسَنَ الْقَصَصِ

Yaani "(Aye Nabi ﷺ) Hum Tumhare Samne Sab Se Achha Waqiya Bayaan Karte Hain" 

Allah Ta'ala Is Waqiye Ko Sab Se Achha Waqiya Farma Raha Hai, Is Ke Bawajood Bhi Aurato Ko Is Ki Tafseer Padhane Se Mana Kiya Gaya Hai 
Ab Sawal Ye Uth'ta Hai Ke Kyun Mana Kiya Gaya? Is Waqiye Mein Aisa Kya Hai?......, 
In Sawalo Ka Jawab Jaanne Se Pehle Ye Jaanne Ki Koshish Kijiye Ke Aap Ki Ladki Ko Matric Tak Padhaye Jaane Waale Subjects Mein Kya Kya Maujood Hai? 
English Aur Hindi Kitabo Mein Kaise Waqiyaat Maujood Hai? 
Aap Ki Ladki Ke School Bag Mein Maujood Science Ki Kitab Mein Kya Kya Hai? 
Matric Tak (Taqreeban 13-14 Saal Tak) Rozana Paanch Se Chhe Ghante Tak (Taqreeban 27,000 Ghanto Tak) Kya Padhaya Gaya? 
College Mein Aap Ki Ladki Ne Kya Padha? 
Jism Ke Hisso (Parts Of Body) Ke Naam Par Kya Kya Jaanne Ko Mila?
Lecture Mein Kya Tha? Tarikh Mein Kya Tha? Zoology Mein Kya Jaana? Botany Mein Kya Seekha? Computer Course Mein Kya Seekha?......? 

Jab Aap Ye Sab Jaan Lein Us Ke Baad Ye Jaanne Ki Koshish Kijiyega Ke Surah -e- Yusuf Ki Tafseer Kyun Nahin Padhani Chahiye 
Aap Ko Kisi "Molvi Type" Shakhs Ke Chakkar Mein Phansne Ki Zaroorat Nahin Hai Kyunki Aap Un Se Zyada Apni Ladki Ke Liye Bhalayi Ke Talabgaar Hain

Aur Haan! Ye Bhi Bata Dijiyega Ke "Humara Unwaan" Kis Tarah Ghalat Hai
Agar Humari Baatein Ghalat Hain To Inhein Deewar Par Maar Dein Aur "Muqable" Mein Zaroor Hissa Lein, Dakhila (Admission) To Humesha Jaari Hai

Abde Mustafa

Post a Comment

Leave Your Precious Comment Here

Previous Post Next Post