Masajid Ke Imamo Ke Halaat

Ahle Sunnat Ki Masjido Mein Imamat Karne Waalo Ke Jo Halaat Hain Wo Bahut Bure Ho Chuke Hain
Imamat Ki Ahmiyat Aur Zaroorat Se Har Musalman Waqif Hai Aur Is Ki Fazeelat Ke Liye Sirf Itna Kehna Kaafi Hoga Ke Allah Ke Nabi, Huzoor -e- Akram ﷺ Ne Bhi Imamat Farmayi Hai

Ab Jo Hum Bayaan Karne Ja Rahe Hain Wo Aankho Dekhi Baatein Hain Jo Hum Ne Kuchh Masjido Mein Dekhi Hain Warna Allah Behtar Jaanta Hai Ke Kahan Kahan Aisi Zabu'n Haali Hai

Imam Aisa Shakhs Hai Jis Ke Paas Sanad (Degree) To Hai Lekin Namaz Ke Bunyadi Masail Tak Ka Ilm Nahin Hai
Hum Maante Hain Ke Imamat Ke Liye Aalim Hona Shart Nahin Hai Lekin Is Ka Ye Matlab Hargiz Nahin Hai Ke Jis Ko Faraizo Wajibaat Tak Ka Ilm Na Jo Wo Imam Ban Jaaye

Aise Log Imamat Kar Rahe Hain Jinhein Farz Aur Wajib Ki Tareef Bhi Sahih Se Maloom Nahin Hai
Aise Log Apne Saath Saath Apne Pichhe Khade Hone Waale Logon Ki Namazo Ko Bhi Barbad Kar Rahe Hain 

Ab Zulm Ki Inteha Dekhiye Ke Jumuah Ke Din Wahi Imam Taqreer Bhi Karta Hai
Ab Ye To Nahin Kaha Ja Sakta Ke Taqreer Karne Ke Liye Bhi Aalim Hona Zaroori Nahin Kyunki Ulama Ne Waazeh Taur Par Likha Hai Ke Ghaire Aalim Ka Taqreer Karna Haraam Hai
Is Ke Ilawa Muhalle Mein Aaye Din Mehfil -e- Milad Ka Ineqad Hote Rehta Hai Jis Mein Wahi Imam Saahib Muqarrir -e- Khusoosi Hote Hain
Jab Aise Log Taqreer Karte Hain To Jo Moonh Mein Aata Hai Bol Kar Nikal Jaate Hain Jis Ki Wajah Se Awaam Gumraah Hoti Hai
Namazein To Gayi Upar Se Iman Bhi Khatre Mein Aa Gaya! 

Baaz Awqaat Imam Agar Kahin Gaya Hai To Us Ii Ghair Maujoodgi Mein Moazzin Saahib Imamat Ke Liye Khade Ho Jaate Hain Jin Se Namaz Ke Faraiz Puchhe Jaayein To Jawab Mein Kehte Hain Ke Namaz Mein Paanch Faraiz Hai (Fajar Ta Isha) Aur Qira'at Mein To Aisi Roohaniyat Hoti Hai Ke Kuchh Huroof Balki Mukammal Aayat Hi Sunayi Nahin Deti

Bayaan Karne Ko Lambi Dastaan Hai Lekin Yahi Bahut Badi Baat Hai Ke Logon Ki Namazo Ke Saath Saath Un Ka Iman Bhi Khatre Mein Hai! 
Ab Is Ka Zimmedar Kaun Hain? Is Ki Islah Kaise Mumkin Hai? Awaam Ko Kya Karna Chahiye? Imam Ka Intekhab Kaise Ho?......? In Sab Baato Par Humare Akabir Ulama Ko Tawajjoh Dene Ki Zaroorat Hai
Har Ahle Ilm Ki Bhi Zimmedari Banti Hai Ke Jis Tarah Ho Sake Is Maamle Mein Aawaaz Buland Karne Ki Koshish Karein 

Abde Mustafa

Post a Comment

Leave Your Precious Comment Here

Previous Post Next Post