Bahaar -e- Shariat - Ilm Ka Khazana

Kitabein To Bahut Hain Lekin Bahaar -e- Shariat Ki Baat Hi Juda Hai
Urdu Zubaan Mein Koi Aisi Kitab Nahin Jise Bahaar -e- Shariat Ke Muqable Mein Pesh Kiya Ja Sake 
Ye Kitab Bees (20) Hisso Par Mushtamil Hai, Is Ke Ibtedayi Chhe (6) Hisso Ke Baare Mein Khud Saahib -e- Bahaar -e- Shariat, Hazrat Allama Mufti Amjad Ali Aazmi Rahimahullahu Ta'ala Likhte Hain Ke Is Mein Rozmarra Ke Aam Masail Hain, In Chhe Hisso Ka Har Ghar Mein Hona Zaroori Hai Taaki Aqaid, Taharat, Namaz, Zakaat Aur Hajj Ke Fiqhi Masail Aam Faham Salees Urdu Zubaan Mein Padh Kar Jaayezo Najayez Ki Tafseel Maloom Ki Jaaye

Is Kitab Ka Pehla Hissa Jo Aqaid Ke Bayaan Par Hai, Qabil -e- Tareef Hai
Behtareen Andaaz Mein Aqaid -e- Ahle Sunnat Ko Bayaan Kiya Gaya Hai, Is Mein Jo Tarz Apnaya Gaya Hai Wo Dil Lubhane Waala Hai
Aqaid -e- Batila Ka Ilmi Andaaz Mein Radd Bhi Kiya Gaya Hai, Ulama Ho Ya Awaam Sab Ko Is Ka Mutala Karna Chahiye 

Rozana Dars Dene Ke Liye Ye Ek Behtareen Kitab Hai, Kayi Masjido Mein Aisi Kitabo Se Dars Diya Jaata Hai Jis Mein Hikayaat Waghaira Ki Kasrat Hoti Hai Jis Se Samayeen (Listeners) Ko Koi Khaas Fayeda Nahin Hota, Agar Is Kitab Se Dars Diya Jaaye To Aqaid Ki Malumaat Ke Saath Saath Rozmarra Ke Masail Bhi Maloom Ho Jayenge

Is Kitab Ki Ahmiyat Ka Andaza Is Baat Se Bhi Lagaya Ja Sakta Hai Ke Is Ki Tasneef Ka Arsa Taqreeban 27 Saal Hai! 
Is Kitab Ka Ek Naam "Aalim Banane Waali Kitab" Bhi Hai Aur Yaqeenan Jo Shakhs Is Kitab Ko Mukammal Padh Kar Achhi Tarah Samajh Le Wo Aalim Hai
Ulama -e- Ahle Sunnat Ne Bhi Is Kitab Ko Aalim Banane Waali Kitab Tasleem Kiya Hai

Aaj Humari Awaam Balki Afsos, Kayi Khawas Bhi Kitabo Se Door Ho Chuke Hain Aur Yahi Wajah Hai Ke Ek Achhi Khaasi Tadaad Ilm Se Door Ho Gayi
Bahaar -e- Shariat Jaisi Kitab Humare Darmiyan Maujood Hai Aur Ye Sirf Kitab Nahin Balki Ek Anmol Khazana Hai Jise Humein Pehchanne Ki Zaroorat Hai
Humari Zimmedari Hai Ke Aisi Kitabo Ko Khoob Aam Karein Aur Khud Bhi Padhein

Abde Mustafa

Post a Comment

Leave Your Precious Comment Here

Previous Post Next Post