Jannati Zewar - Aurato Ke Liye Ek Behtareen Kitab

"Jannati Zewar" Is Naam Se Milte Julte Naamo Ki Aur Bhi Kuchh Kitabein Hain, Hum Jis Ki Baat Kar Rahe Hain Wo Hazrate Allama Abdul Mustafa Aazmi Alaihirrahma Ki Tasneef Hai
Ye Kitab Aurato Ke Liye Bahut Mufeed Hai

Kitab Ke Aaghaz Mein Ikhtesar Ke Saath Bayaan Kiya Gaya Hai Ke Huzoor -e- Akram ﷺ Ki Aamad Se Pehle Aurato Ke Kitne Bure Halaat The Aur Un Ke Huqooq (Rights) Ko Kis Tarah Qadmo Tale Raunda Ja Raha Tha, Phir Huzoor Ki Aamad Se Aurato Ko Kya Izzatein Aur Bulandiya Naseeb Huyi

Is Ke Baad Kitab Mein Aurat Ki Zindagi Ke Mamlaat Par Tafseeli Kalaam Kiya Gaya Hai
Bachpan, Bulooghat, Nikah Waghaira Anaween Ke Ziman Mein Biwi Ko Kaisa Hona Chahiye, Bahu Ke Faraiz, Ek Dusre Ke Huqooq, Parde Ke Ahkam Waghaira Ko Bayaan Kiya Gaya Hai

Phir Akhlaqiyat Par Likhte Huye Musannif Ne Buri Aadato Aur Achhi Aadato Ko Bayaan Kiya Hai
Ghussa, Hasad, Lalach, Kanjusi, Takabbur, Chughli, Gheebat, Jhoot, Badgumani, Riyakari Aur Phir Qana'at, Hilm, Sabr, Shukr, Haya Aur Saadgi Ki Tafseel Shamil -e- Bayaan Hai

Rusoomat Ka Bayaan Dilchasp Hone Ke Saath Saath Malumaati Bhi Hai Aur Zamane Ke Mutabiq Zaroori Masail Is Mein Darj Kiye Gaye Hain
Jahez Ki Rasm, Tahwaro Ki Rasmein, Muharram Ki Rasmein Aur Phir Majalis Wa Fatiha Waghaira Ki Unwan Dekhne Ko Milte Hain

Imaniyat, Ibadaat Aur Islamiyat Ke Bayaan Mein Saikdo Fiqhi Masail Maujood Hain Jin Ka Seekhna Har Aurat Par Farz Hai
Is Ke Ilawa Sunnato Aur Aadab Ko Bhi Bayaan Kiya Gaya Hai
Uthne Baithne Ke Tariqe Se Le Kar Khane Peene Aur Sone Jaagne Tak Ka Bayaan Maujood Hai

Aakhir Mein Un Nek Aur Paak Aurato Ka Tazkira Kiya Gaya Jai Jin Ki Zindagi Aurato Ke Liye Namoona Hai
Ummahatul Momineen, Kayi Sahabiyaat Aur Salihaat Ki Zindagiyo Ke Kuchh Pahluo Ko Naqal Kiya Gaya Hai Aur Phir Hidayaat Bayaan Karne Ke Baad Amaliyaat Ke Tehat Mukhtalaf Surato Aur Aayaat Se Ilaaj Bayaan Karte Huye Kitab Ko Takmeel Tak Pahunchaya Gaya Hai

Aurato Ko Is Kitab Ka Muatala Karna Chahiye, Ye Urdu Aur Hindi Mein Maujood Hai

Abde Mustafa

Post a Comment

Leave Your Precious Comment Here

Previous Post Next Post