Teen Talaq Mein Ye Bhi

Teen Talaq Ke Mas'ale Ko Le Kar Jo Kuchh Bhi Hua, Us Ke Hal Ke Liye Jin Ulama -e- Ahle Sunnat Ne Bhi Koi Kirdar Nibhaya Wo Sab Qabil -e- Tareef Hain, Sab Ne Achha Kaam Kiya Aur Hum Un Ke Liye Dua Go Hain Lekin Is Ka Ek Dusra Pahlu Bhi Hai Jis Par Baat Honi Chahiye, Hum Usi Pahlu Ko Aap Ke Saamne Rakhna Chahte Hain

Baat Ye Hai Ke Jin Aurato Ko Talaq De Kar Chhod Diya Gaya Hai Un Se Nikah Karega Kaun? Un Ka Sahara Banne Ke Liye Kaun Tayyar Hoga? Un Ka Haath Thamne Ke Liye Kaun Aage Badhega? 
Jin Ki Shadi Nahin Huyi Kya Wo Ek Talaq Shuda Aurat Se Nikah Ke Liye Tayyar Honge? Agar Kunware Ye Kaam Nahin Karenge To Kya Jin Ki Shadi Ho Chuki Hai Wo Himmat Kar Sakte Hain? Phir Un Aurato Ki Zindagiyo Ka Kya? 

Ye Kuchh Aisi Baatein Hain Jin Par Baat Karna Bahut Zaroori Hai 
Ek Jawan Kunwara Ladka Kisi Bewa Se Nikah Nahin Karna Chahta Aur Ek Shadi Shuda Shakhs Chah Kar Bhi Nahin Kar Sakta Kyunki Agar Us Ne Kuchh Aisa Karne Ki Sochi Bhi To Pehli Biwi Aur Us Ke Ghar Waale Aur Phir Apne Ghar Waale Hi Rukawat Ban Jayenge
Ab Jab Aise Halaat Hain To Ek Bewa Ke Saamne Kaun Sa Raasta Bachta Hai? Ya To Wo Khudkushi Kar Legi Ya Mazdoori Kar Ke Apni Zindagi Basar Karegi Aur Teesra Raasta Wo Hai Jise Hum Bayaan Nahin Kar Sakte 

Hum Kis Moonh Se Un Aurato Ke Haque Ki Baat Karein Jinhein Talaq De Kar Ghar Se Nikala Ja Chuka Hai? Hum Khud Unhein Apnane Ke Liye Tayyar Nahin Hain 
Humare Nabi ﷺ Ne Pehla Nikah Kin Se Kiya? Is Mein Humare Liye Koi Paigham Hai Ya Nahin? Hum Kab Is Sunnat Par Amal Karenge Aur Kab Teen Chaar Shadiyo Ka Riwaaj Aam Hoga? Ye Kuchh Aise Sawalaat Hain Jin Ke Baare Mein Humein Sochne Ki Zaroorat Hai

Abde Mustafa

Post a Comment

Leave Your Precious Comment Here

Previous Post Next Post