Dafaa Ya Difaa


Musalmaano Ke Darmiyan Ittifaq Wa Ittihad Ko Qaayim Rakhne Ke Liye Ye Bhi Zaruri Hai Ki Apne Bhaiyo Ko Dafaa Karne Ke Bajaye Un Ka Difaa Kiya Jaaye. Doosre Alfaaz Mein Ye Ki Masail Ki Mukammal Chaan Bheen Kiye Baghair Apne Bhaiyon Par Deen O Sunniyat Se Ghaddari Ka Ilzaam Lagana Harghiz Sahih Nahi Hai. Mas'ala Agar Furooyi Hai To Phir Usi Lihaaz Se Baat Karein. Agar Koi Aapko Shiddat Ki Taraf Le Jaane Ki Kosish Karta Hai To Aap Us Ka Haath Pakad Kar Chal Dene Se Parhez Karein Aur Apne Bhai Ka Difaa Kare. 


Aaj Kal Dekha Jaata Hai Ke Kayi Log Baat Baat Par Apne Hi Sunni Bhaiyon Par Maslak Ki Ghaddari Ka Ilzaam Laga Kar Use Dafaa Karne Ki Khoob Koshish Karte Hain. Ye Ek Bahut Badi Ghalati Hai Jis Ka Asar Musalmaano Ke Ittihad Par Padhta Hai. Ittihad Ki Sakht Zaroorat Hai Warna Tukdon Mein Taqseem Ho Jaane Waale Aksar Barbaad Hote Hain. 


Kayi Masail Ilmi Hote Hain Jo Aawam Ki Samajh Se Baahar Hote Hain To Muqarrireen Aur Wayizeen Ko Bhi Is Baat Ka Lihaaz Karna Chajiye Ki Aise Masail Ko Mukammal Wazaahat Ke Saath Bayan Karein. Ikhtilaafi Masail Ki Aag Aawam Mein Bhadka Kar Ghar Mein So Jaane Waale Nahin Jaante Ki Ye Aag Ittihad Ko Jala Kar Raakh Kar Deti Hai. Ek Musalman Doosre Ka Dushman Ban Jaata Hai. Log Ulama Ki Ghustakhi Par Utar Aate Hain. Jo Muatbar Ulama Hain Un Par Bhi Aitbar Dagmagaane Lagta Hai.


Aslaaf Ko Padhien To Maloom Hota Hai Ke Wo Is Muaamle Mein Had-Darja Muhtaat The. Wo Kisi Par Bhi Hukm Lagane Se Pahle Bharpoor Tehqeeq Karte The. Agar Kisi Ke Difaa Ki Gunjaish Maujood Hoti To Us Ka Difaa Karte The. Humein Bhi Is Tariqe Ko Apnane Ki Zarurat Hai. Ye Qaul Bhi Aap Ne Suna Hoga Ki Kisi Ke Qaul Me Ninyanwe Jahto Se Kufr Saabit Hota Ho Aur Ek Pahlu Imaan Ka Hota Ho To Humein Mumkin Taaweel Karni Chahiye Jab Tak Ke Sarih Kufr Na Mile. Ye Bhi Musalmaano Ko Muttahid Rakhne Me Muaavin Saabit Hota Hai Warna Dafaa Karna Aasan Hai Par Durust Nahi. 


Imam Ghazali Likhte Hain Ki Dost Ki Muhabbat Badhane Mein Ye Baat Sabse Aham Hai Us Ki Adam Maujoodgi Mein Jab Koi Uski Burayi Bayaan Kare Ya Us Ki Izzat Ke Darpe Ho To Us Ka Difaa Kiya Jaaye, Apne Dost Ki Madad Wa Himayat Ke Liye Kamar Bastaa Ho Jaaye, Us Bad-Go Ko Khaamosh Karwaya Jaaye Aur Us Se Sakht Kalaam Kiya Jaaye. Aise Waqt Mein Khamosh Rahna Seene Mein Keena Aur Dil Me Nafrat Paida Karta Hai Aur Bhai Chaare Ke Haq Me Kotaahi Hai Kyun Ki, Rasoolullah ﷺ Ne Do Musalmaano Ko Do Haathon Ke Saath Is Wajah Se Tashbih Di Ki Un Me Se Ek Doosre Ko Dhota Hai, Lihaza Musalmaano Ko Chahiye Ke Apne Musalman Bhai Ki Madad Karein Aur Us Ka Qaayim Maqaam Bane.


(احیاء العلوم، جلد دوم)


Abde Mustafa

Post a Comment

Leave Your Precious Comment Here

Previous Post Next Post