Malazgirt Ek Yaadgaar Jung


Ek Badi Fauj Jis Mein 35 Hazar Sipah Saalar (Commanders) Aur Commanders Ke Saath 2 Lakh Sawaar,

Is Ke Saath 35 Hazar Firangi,

Qustuntuniya Se 15 Hazar Jungju, 

1 Lakh Khudayi Karne Waale,

1 Lakh Deewar Mein Shigaf Karne Waale,

Chaar So Bail Gaadiyo Par Faujiyo Ke Hathiyar Aur Deegar Saaman, 

Ek Aisi Minjaneeq (Patthar Phenkne Waala Aala) Jise 1200 Log Mil Kar Chalate The Aur Kayi Qism Ke Aalat Le Kar Shahe Rome Romanos Is Irade Se Nikla Ke Islam Aur Ahle Islam Ka Naamo Nishan Mita Dega Par Use Kya Khabar Thi Ke Apni Jaan Hatheli Par Rakh Kar Ghoomne Waale Musalman Saans Le Rahe Hain Aur Jab Tak Aakhiri Saans Baaqi Hai Wo Khoon Ke Aakhiri Qatre Tak Muqabla Karenge

Use Khud Par Itna Bharosa Tha Ki Jung Se Pehle Apne Commanders Ko Shahar Baant Diye The Hatta Ki Baghdaad Ko Ek Commander Ki Jaageer Mein De Diya Tha


Us Kaafir Se Muqabile Ke Liye Sultan Alp Arslan Apni Fauj Ke Saath Aage Badhe Jis Ki Taadad Bees Ya Pacchis Hazar Thi!

Jab Sultan Alp Arsalan Ne Un Ki Tadaad Dekhi To Thodi Der Ke Liye Pareshan Huye. Is Par Ek Aalime Deen, Faqeeh Abu Nasr Muhammad Bin Abdul Malik Bukhari Hanafi Ne Un Ko Hausla Diya Aur Kaha Ki :

Sultan! Jumuah Ke Din Jung Kijiye Jab Khutba Mein Mujahideen Ke Liye Dua Ki Jaa Rahi Ho, Ain Us Waqt Dushman Par Humla Kar Dein! Allaah Ta'ala Fatah Ataa Farmayega.


Agar Aaj Ka Jamhuriyat Ka Maara Aalim Hota To Kahta Ki Sultan Saahib Ye To Maut Ko Dawat Dene Ke Mutaradif Hai. Itne Bade Lashkar Se Ladne Ki Humari Taaqat Nahin Lihaza Aman, Shanti Huikmat Aur Maslihat.....


Jumuah Ka Din Aaya, Sultan Alp Arsalan Ne Maidan E Jung Mein Apni Peshani Ko Rakha Aur Allaah Ta'ala Se Fatah Wa Nusrat Ki Dua Ki Aur Fir Allaah Ta'ala Ki Madad Aan Pahunchi.

Hazaro Ne Lakhon Ko Dhool Chaatne Par Majboor Kar Diya. Shah Rome Romanos Ko Giraftar Kar Liya Gaya.


Ye Koi Maamuli Baat Nahin Thi Ki Ek Mukhtasar Se Lashkar Ne Itne Bade Lashkar Ko Dhool Chata Di. Is Waqiye Ne Roomiyon Ki Kamar Tod Kar Rakh Di. Roomi Shahanshahiyat Ki Buniyadein Hil Gayi. Un Ilaaqon Mein Roomiyo Ki Saltanat Kamzor Ho Gayi Aur Saljooqi Saltanat Ka Parcham Buland Hua Fir Aage Chal Kar Is Saltanat Ke Khatime Par Saltanat E Usmaniya Ki Buniyad Rakhi Gayi.


(تاریخ ابن کثیر، ج12، ص108، و دولت عثمانیہ، ص81)


Abde Mustafa

Post a Comment

Leave Your Precious Comment Here

Previous Post Next Post