Muhabbat Ki Haqeeqat Aur Dil Ki Haalat


Hazrate Shibli Alaihi Rahma Farmate Hain :

Ek Dafa Main Ne Ek Mazjoob (Yaani Majnoo, Deewane) Dekha Jise Bacche Patthar Maar Rahe The, Uska Chehra Aur Sar Lahu Luhaan Aur Shadeed Zakhmi Tha!

Hazrat Sayyiduna Shibli Alaihi Rahma Un Baccho Ko Daantne Lage To Unhone Kaha :

"Humein Chhod Do! Hum Ise Qatl Karege Kyunki Ye Kaafir Hai! Aur Kehta Hai Ke Isne Apne Rab Azzawajal Ko Dekha Hai Aur Wo Is Se Kalaam Bhi Karta Hai."

To Aap Alaihi Rahma Ne Bacchon Se Farmaya:

Ise Chhod Do, Phir Aap Rahmatullah Ta'ala Alaih Ne Us Ke Paas Tashrif Le Gaye To Wo Muskura Kar Baatein Kar Raha Tha Aur Kehne Laga:

"Aye Khubsoorat Naujawan! Aap Ka Ehsaan Hai, Ye Bacche To Mujhe Bura Bhala Keh Rahe The."


Us Ke Baad Us Ne Poocha: "Wo Mere Mutalliq Kya Keh Rahe The?" Aap Rahmatullah Ta'ala Alaih Farmate Hain Ke Main Ne Usko Bataya: "Wo Kehte Hain Ke Tum Apne Rab Azzawajal Ko Dekhne Ka Daawa Karte Ho Aur Ye Ke Wo Tumse Kalaam Bhi Karta Hai."

Ye Sun Kar Us Ne Ek Zordaar Cheenkh Maari, Phir Kehne Laga:

"Aye Shibli! Haq Ta'ala Ki Muhabbat Wa Qurbat Se Mujhe Sukoon Milta Hai, Agar Lamha Bhar Bhi Wo Mujh Se Chhup Jaaye To Mein Darde Firaaq Se Paara Paara Ho Jaaun."


Hazrat Sayyiduna Shibli Alaihi Rahma Farmate Hain Main Samajh Gaya Ke Ye Mazjoob Ikhlaas Wale Khas Bando Mein Se Ek Hai.

Mein Ne Us Se Poocha: "Aye Mere Dost! Muhabbat Ki Haqeeqat Kya Hai?"

To Us Ne Jawab Diya:


"Aye Shibli! Agar Muhabbat Ka Aik Qatra Samandar Mein Daal Diya Jaaye (To Woh Khushk Ho Kar) Yaa Pahaad Par Rakh Diya Jaaye To Wo Gubaar Ke Bikhre Huye Bareek Zarre Ho Jaayein! Lihaaza Us Dil Par Kaisa Toofan Guzrega Jis Ko Muhabbat Ne Izteraab Aur Girya Wazari Ka Libaas Pehna Diya Ho, Aur Sakht Pyaas Ne Us Ke Andar Jalan Aur Hasrate Deedar Ko Badha Diya Ho."


(الروض الفائق، ص35) 


Allah Allah!

Waaqayi Muhabbat Koi Aam Shai Nahin, Ye Aashiq Ko Jalaa Deti Hai.

Agar Muhabbat Ka Ek Qatra Samandar Ko Khushk Kar Sakta Hai Aur Pahaadon Ko Bikharne Par Mazboor Kar Sakta Hai To Phir Dil Ke Saath Jo Muamla Hota Hai Woh Alfaaz Se Kis Tarah Bayaan Kiya Jaa Sakta Hai.


Abde Mustafa

Post a Comment

Leave Your Precious Comment Here

Previous Post Next Post