Sahabi -e- Rasool Ki Wasiyat


Junge Uhud Mein Ja Nisar Sahaba E Kiram Ne Kayi Qurbaniya Di.

Muflisi Ka Ye Aalam Tha Ki Shuhada E Kiram Ke Kafan Ke Liye Kapda Bhi Mayassar Na Tha.

Kahin Ek Qabr Mein 2 Shaheedo Ko Dafnaya Gaya To Kafan Tang Hone Ki Surat Mein Kisi Ke Pairo Ko Dhakne Ke Liye Ghas Daal Di Gayi.


Isi Jung Mein Nabi E Kareem ﷺ Ke Pyaare Chacha, Hazrat E Ameer E Hamza Ko Shaheed Kar Diya Gaya!

Ek Taraf Jung Ka Ailan Sunkar Apni Beewi Ko Chhodh kar Jung Mein Shaamil Hone Waale Ko Firishton Ne Gusl Diya,

Doosri Taraf Kisi Ne Dono Hath Kat Jaane Ke Baad Bhi Apne Seene Se Parchame Islam Ko Sahara Diya Aur Use Buland Rakha.

Kahin Kisi Ki Laash Mein Assi Se Zyada Zakhm Mile To Kahin Kisi Ke Kaan Naak Waghaira Kaat Kar Surat Bigad Di Gayi.

Kisi Ne Nabi E Paak ﷺ Ke Qadmon Par Apni Aakhiri Saanse Li To Koi Khajoor Khaate Huye Jannat Ka Mehman Hua,

Koi Langdaate Huye Jannat Ki Taraf Chala To Kisi Ne Teer Chala Chalakr Kayi Kamanon Ko Tod Diya,

Isi Jung Mein Nabi E Kareem ﷺ Ke Dandaane Mubarak Se Kuch Hissa Juda Ho Gaya Aur Rukh E Anwar Par Zakhm Aaye.


Itna Kuch Hone Ke Baad Bhi Sahaba E Kiraam Ne Himmat Na Haari Aur Qadam Se Qadam Mila Kar Kuffar Se Takraate Rahe Aur Nabi E Paak ﷺ Par Apni Jaane Qurbaan Karte Gaye.


Hazrat E Zaid Bin Saabit Radi Allahu Ta'ala Anhu Ka Bayan Hai Ki Mai Huzoor ﷺ Ke Hukm Se Hazrate Sa'ad Bin Rabi'a Ki Lash Ki Talash Mein Nikla To Maine Unko Naz'aa Ke Aalam Mein Paaya. Unhone Mujh Se Kaha Ki Tum Rasoolullah ﷺ Se Mera Salam Arz Kar Dena Aur Apni Qaum Se Baade Salam Mera Ye Paigham Suna Dena Ki Jab Tak Tum Mein Se Ek Aadmi Bhi Zinda Hai Agar Rasoolullah ﷺ Tak Kuffar Pahunch Gaye To Khuda Ke Darbar Mein Tumhara Koi Ujr Bhi Qabile Qubool Na Hoga. Yah Kahne Ke Baad Unki Rooh Parwaaz Kar Gayi.


(زرقانی، ج2، ص48 بہ حوالہ سیرت مصطفی، ص278)


In Baato Ko Bayan Karne Ka Ek Maqsad To Ye Hai Ki Musalman Apni Tareekh Ko Jaanein Ki Kitni Qurbaniyon Ke Baad Ye Deen Hum Tak Pahucha Hai. Humara Bhi Farz Banta Hai Ki Apni Aane Waali Naslo Ke Liye Kuch Karein Taaki Unhein Deene Haq Se Juda Na Kiya Ja Sake.

Humein Deene Haq Ke Liye Jaan Dene Se Bhi Nahin Darna Chahiye Kyun Ki Is Raah Mein Jaan Dene Se Insan Marta Nahin Balki Shaheed Ho Jaata Hai. Allah Ta'ala Musalmanon Ko Deen Par Qurban Hone Ka Jazba Ata Farmaye.


Abde Mustafa Riyaz Qadri

Post a Comment

Leave Your Precious Comment Here

Previous Post Next Post