Pyaar Kiya Phir Sabr Kiya Aur Phir Hazrate Ali Ne Shadi Karwa Di

Hazrate Ali Radiallaho Ta'ala Anho Ki Ek Baandi Thi Aur Ek Moazzin Bhi Tha Jo Ruhaba Mein Rehta Tha Aur Subah Andhere Mein Azaan Deta Tha Aur Ye Baandi Nehar Se Paani Lene Jaaya Karti Aur Jab Is Moazzin Ke Paas Se Guzar Hota To Ye Kehta Ke Aye Fulaani! Allah Ki Qasam Main Tumse Muhabbat Karta Hoon! 

Jab Ye Isne Kayi Dafa Kiya To Baandi Ne Hazrate Ali Ko Ye Baat Bata Di

Hazrate Ali Ne Kaha Ke Ab Ki Baar Jab Wo Tumhein Aisa Kahe To Tum Bhi Kehna Ke Haan Main Bhi Tumse Muhabbat Karti Hoon, Ab Kya Chahte Ho? Us Baandi Ne Aisa Hi Kaha To Us Moazzin Ne Kaha Ke Ab Hum Sabr Karenge Hatta Ke Allah Ta'ala Koi Faisla Na Farma De Aur Beshak Wahi Behtar Faisla Farmane Waala Hai

Ye Baat Baandi Ne Hazrate Ali Ko Batayi To Aapne Us Moazzin Ko Bulwaya Aur Use Khush Aamadeed Kar Ke Apne Paas Baithaya Aur Puchha Ke Kya Tumhein Fulaani Se Muhabbat Hai? 

Usne Arz Kiya : Haan Ameerul Momineen! 

Aapne Puchha Ke Kya Kisi Aur Ko Bhi Ilm Hai? 

Arz Kiya : Allah Ki Qasam Aur Kisi Ko Iska Ilm Nahin

Phir Aapne Baandi Use De Ke Farmaya Ke Ise Le Jaao Aur Ye Allah Hi Ke Hukm Se Hai Aur Allah Behtar Hukm Karta Hai 

(ذم الھوی لابن جوزی) 

Pyaar Ke Maaro Par Humare Akabireen Taras Khaate Aaye Hain, Un Pe Reham Karne Ka Dars Hume Sahaba Ke Amal Se Milta Hai Aur Jab Koi Sharayi Wajah Na Ho To Pyaar Karne Waalo Ko Mila Dena Hi Achha Hai

Aaj Kal Pehle To Zaroori Hai Ke Khud Isse Bachein Aur Apni Awlaad Ko Bachayein Lekin Jaisa Ke Zaahir Hai, Ye Aisa Aam Ho Gaya Hai Ke Bachhe Se Bade, Har Ek Ki Koi Na Koi Kahani Hai To Is Mein Zaroori Hai Ke Unki Madad Ki Jaaye Aur Wo Is Tarah Ke Unhein Rishte Mein Baandh Diya Jaaye Warna Fitne Sar Uthayenge

Ishqe Majazi Ki Tabahkariyo Pe Baat Karein, Zaroori Hai Par Ek Tarfa Hi Baat Karna Aur Jo Is Mein Pad Chuke Hain Unhein Koi Raah Na Dikhana Ye Sahih Nahin Hoga Warna Wo Khud Apni Raahein Bana Lenge Jo Shayad Mazeed Tabahkariyo Ka Sabab Ban Jaaye

Abde Mustafa Official

Post a Comment

Leave Your Precious Comment Here

Previous Post Next Post