Jhoote Tabeeb Mutawajje Ho'n!!! 


Hadeese Paak : "Jo Takallufan Ilaaj Kare Aur Use Ilme Tibb Na Aata Ho To Wo Zamin Hai."


Nabi E Kareem Sallallaho Ta'ala Alaihi Wasallam Ke Is Farman Ki Wazahat Ye Hai Ke Jis Ne Tibb Ke Usool Wa Zawabit Na Padhe Ho Aur Wo Logo Ke Samne Khud Ko Tabeeb Zaahir Kar Ke Ilaaj Kare Aur Us Ke Ilaaj Se Koi Mar Jaaye Ya Mareez Ko Kisi Qism Ka Nuqsan  Pahunche To Wo Jaali Tabeeb Diyyat Ka Zaamin Hai.


Khwaah Insan Ho Ya Janwar Ilaaj Har Jandaar Ki Zarurat Hai Choonki Insan Makhlooqat Mein Afzal Hai Isiliye Us Ki Izzat Aur Takreem Ki Ahmiyat Bhi Utni Hi Zyada Bayan Ki Gayi Hai Aur Insani Jaan Ki Sihhat Aur Us Ki Hifazat Ke Liye Zaruri Iqdam Karne Ko Zyada Aham Qarar Diya Hai. Insani Sihhat Ki Hifaazat Ke Liye Ilaaj Ki Sahoolat Hone Ke Sath Muaalij Ka Maahir Hona Bhi Nihayat Zaruri Hai.


Maal Wa Daulat Ki Lalach Bhi Aisa Karne Par Ubhaarti Hai Bil Khusoos Wo Pas Maand Ya Taraqqi Pazeer Ilaaqe Jahan Aspatal Ki Sahulat Maujood Nahi Ya Bahut Door Door Hai To Aisi Soorat Mein Is Tarah Ke Maqaamat Sone Ki Chidiya Sabit Hote Hain, Aise Log Un Maqaamat Par Apni Natajurba Kaari Ki Wajah Se Kayi Jaano Ki Ziya Ka Sabab Bante Hain.

(ابن ماجہ، 4، حدیث، 3466)


Baaz Afraad Ko Har Kaam Mein Koodne Aur Muft Ke Mashware Dene Ka Shauq Hota Hai Aise Log Apni Aadat Se Majboor Hokar Har Beemari Ka Ilaj Batate Firte Hain Aur Us Tareeqa E Ilaaj Ko Apnaane Par Israar Bhi Karte Hain Kabhi Kabhi To Aise Totke Bhi Batate Hain Jo Marz Bhagane Ke Bajaye Us Ki Shiddat Badha Deta Hai Aur Un Ke Mashware Ke Ghalat Hone Ka Andaza Waqt Guzarne Ke Baad Hota Hai. Aise Mashware Tadbeer Ke Tajweez Karda Ilaaj Se Wahi Najaat Paa Sakta Hai Jis Ki Aql Haazir Aur Zinda Ho.

(اسعاف الحاجتہ، 579، تحت الحدیث، 3466)


Baaz Log Mareez Se Bughz Wa Keena Ki Wajah Se Use Ghalat Dawaiya Bata Dete Hain Aur Dawayi Ke Ulte Asraat Dekh Kar Khush Hote Hain.


Baaz Logo Ko Insano Par Tajurbe Karne Ka Shauq Hota Hai Usi Shauq Ko Wo Yun Poora Karte Hain Ki Tarah Tarah Ki Dawaiyo Ke Fawayid Wa Nuqsan Janne Ke Liye Aam Seedhe Saadhe Aur Bhole Bhaale Logo Par Tajurba Karte Hain Umuman Medical Store Waalo Se Log Bimari Bata Kar Dawa Talab Karte Hain Wo Bhi Tajurbe Ke Shauq Main Doctor Ki Hidayat Ke Bagair Dawa De Dete Hain Jis Ke Nataaij Takleef Main Izaafe Aur Jaan Jaane Jaisi Bhayanak Soorat Main Nikalte Hain.


Jhoothe Tabeeb Dar Asal Be Rahmi Intiqaami Mijaz Aur Is Tarah Ke Kayi Wujuhaat Ke Paidawar Hote Hain Lihaza Humein Ye Yaad Rakhna Chahiye Ke Islam Humein Raham Dili Ka Hukm Deta Hai. Chunanche Hadeese Qudsi Main Hai: Agar Tum Meri Rahmat Chahte Ho To Meri Makhlooq Par Raham Karo.


Nabi E Kareem Sallallahu Alaihi Wasallam Ne Farmaya : Be Shaq Allah Paak Apne Raham Karne Waale Bandon Par Hi Raham Farmata Hai. Islam Humein Be Hasi Wa Be Rahmi Se Bachata Hai Jaisa Ke Humare Nabi Sallallahu Alaihi Wasallam Ne Irshad Farmaya Jo Logon Par Raham Nahin Karta Allah Paak Us Par Raham Nahin Farmata.

(مسلم، ص975، حدیث2318)


Mareezon Par Raham Ka Taqaaza Ye Hai Ke Hum Kisi Bhi Tarah Ghalat Ilaaj Batane Ke Bajaye Maahir Doctor Se Ruju karne Ka Mashwara Dein. Is Silsile Main Mareez Par Aane Waali Maali Dushwariyon Ko Bhi Hasbe Taufiq Door Karne Ki Koshish Karein. Aur Ye Sab Karte Huye Aise Alfaaz Istimal Karne Se Bachein Jo Mareez Ko Ghaayal Kar Dein Balki Wo Lahja Ikhtiyar Karein Jo Use Ilaaj Ka Qaayil Aur Doctor Ki Jaanib Maail Kar Sake Humara Ye Rawaiya Jhuthe Tabeebon Mein Kami Ka Sabab Banega. In sha Allah

(ماخوذ، ماہنامہ فیضان مدینہ، دعوتِ اسلامی)


Abde Mustafa
Dilbar Raahi Asdaqui

Post a Comment

Leave Your Precious Comment Here

Previous Post Next Post